Pa organisashonnan ta importante pa sosten’é kada empleado den nan desaroyo propio. Un doño di trabou mester por duna empleadonan formashon i sòru ku nan ta dispuesto pa realisá e mishon ku strategia di e organisashon. Esaki ta yuda stimulá embolbimentu di empleadonan mas tantu.
Pa por ehekutá esaki na un manera efektivo, mester inventarisá e nesesidatnan di e empleadonan promé. Di e manera aki bo ta determiná e aktividatnan importante pa nan formashon. Seguidamente bo ta traha pa kada un empleado un plan di karera. Al final bo ta tuma inisiativanan pa garantisá ku kada empleado ta haña oportunidat di training.
Motivá i inspirá empleadonan pa stipulá nan propio plan di karera
Millennials ta ser konsiderá komo e grupo ku mas riesgo pa tuma retiro. Kompanianan ta trata di kontrarestá e tendensia aki bou di millennials, kreando un kultura di trabou agradabel ku por ehèmpel dianan di famia òf fiestanan di trabou. Pero esaki no a resultá komo e solushon mas adekuá. Un total di 86% porshento di millennials ta preferá di keda traha na e mesun kompania ora nan haña oportunidat di training i posibilidatnan pa desaroyo di nan karera.
Un plan individual pa karera ta un paso importante den e trayekto aki. Den kaso ku e doño di trabou duna realse na un plan di karera, empleadonan ta traha ku mas dedikashon. Nan lo kontribuí mas tantu na e éksito di bo kompania. Banda di esaki empleadonan ta krea sintimentunan positivo pa ku nan trabou i bo kompania.
Tips pa yuda desaroyo di bo empleadonan
Akibou tin un lista pa yuda bo komo empresario ku un plan di e karera di bo empleadonan:
- Traha un plan SMART di desaroyo di karera (specifiek, meetbaar, haalbaar, relevant en tijdgebonden)
- Skohe spesífikamente dos òf tres puntonan di desaroyo pa bo empleado.
- Identifiká e estilo di prosesá informashon di bo empleado.
- Selebrá kada logro, asta esnan chikitu!
- Influensiá e mentalidat di bo empleado ku aktividatnan balioso pa su desaroyo propio (evitá medidanan di sanshon).
- Stimulá empleadonan pa kompartí e informashonnan importante ku nan siña ku otro.
Plan di desaroyo pa empleado: bale la pena!
Un plan di desaroyo pa empleado ta eksigí hopi tempu ku esfuerso, pero e resultadonan ta hasi empleadonan mas produktivo ku mas loyalidat na bo empresa. Un koperashon konhunto ku empleado pa nan desaroyo di karera ta krea un situashon di benefisio mutuo pa ámbos partido. E empleado ta haña posibilidat pa siña mas, mehorá sierto abilidatnan. Haña mas konosementu i eksperensia. En kambio di esaki e organisashon por probechá di abilidatnan nobo ku konosementu di bo empleado mas kapas i inovativo.