Kódigo Sivil ta menshoná, pa loke ta trata kombenionan pa traha kontra pago, enfátikamente tres sorto di kombenio:
I kombenio pa traha trabou hustá.
II kombenio pa presta algun servisio.
III kombenio di trabou (pa hasi trabou).
Trabou hustá
Trabou hustá ta un kombenio kaminda un partido, e kontratista, ta mara su mes pa ku e otro partido, e kontratador, pa realisá un trabou di karakter material, pafó di un relashon di trabou, pa un preis stipulá pa e kontratador; i.c. partidonan tin un sierto resultado na bista.
Presta algun servisio
Kombenionan pa presta algun servisio ta presentá den práktika bou di tur sorto di nòmber.
Ta trata prinsipalmente di un relashon entre un profeshonal ku ta ehersé un profeshon liber (abogado, notario, accountant, guia, etc.) i su kliente. I mas aleu tur otro kombenio unda sa hasi trabou, pero kaminda nò tin kestion di un relashon di outoridat (falta e elemento di outoridat), p.e. limpiamentu di un kura, labamentu di outo, etc.
Kombenio di trabou (pa hasi trabou)
Un kombenio pa hasi trabou ta un kombenio pa kua un partido, e obrero (trahadó), ta komprometé su mes pa traha, den servisio di e otro partido, e patron (dunadó di trabou), pa un suèldo durante sierto tempu.
Ora un persona a ehersé trabou pa un otro kontra pago durante tres luna konsekutivo, por lo menos 8 ora pa siman òf 35 ora pa luna, ta wòrdu suponé ku ta eksistí un kombenio di trabou, a menos ku e dunadó di trabou por proba lo kontrario.
E foyeto aki lo trata solamente kombenio di trabou.
Ki ora ta papia di un kombenio di trabou?
Pa por papia di un kombenio di trabou mester tin:
A. Suèldo
B. Trabou
C. Un relashon di outoridat (“den servisio di”)
ad.A: Suèldo ta loke ta kombení komo kontra-prestashon pa e trabou kual e dunadó di trabou debe òf lo debe e trahadó.
Suèldo ta e kontra prestashon di e dunadó di trabou; plaka (un suma fiho, provishon, parti den ganashi) kuminda, paña, produktonan di e empresa i uso di un kas por ta elementonan di e suèldo.
E dunadó di trabou mester tene kuenta ku e stipulashonnan di Lei di Suèldo Mínimo.
ad.B: E trahadó ta obligá di traha; e trabou mester ta di balor i mester hasié personalmente; kier men, e trahadó no ta liber pa laga otro persona hasi su trabou.
ad.C: E trahadó ta den servisio di un dunadó di trabou; e dunadó di trabou ta outorisá pa praktiká outoridat; e dunadó di trabou ta outorisá pa duna direkshon na e trabou; e dunadó di trabou ta outorisá pa kontrolá e trabou i pa duna instrukshon ku mester sigui.
Ta trata kada bes di e situashon real (konkreto) i no kon partidonan ta yama nan relashon.
